Ibophele izinsephe i-Best of the Best Marathon

Sibusiso Mdlalose|Published 3 weeks ago

U-ALLAN Khan oyisikhulu saseDUT, uMthoko Khuzwayo weRavens Athletics Club, uPhumzile Xaba oyisikhulu saseDUT, umgijimi uBongumusa Mthembu, umgijimi waseDUT uPhilasande Mlambo, uMqondisi Ngcobo usihlalo weComrades Marathon, umgijimi uBanele Mabizele, uNdabe Mhlongo weNdabe Dignified Funerals, noSteve Mkasi umengameli weKZN Athletics, ngenkathi kwethulwa iBest of the Best Marathon eDUT, eThekwini, sithombe: SIBUSISO MDLALOSE

UGABE ngensephe @BongumusaMthembu umjaho wanonyaka, i-Best of the Best Marathon, owethulwe, @Durban University of Technology (DUT), eThekwini.

UMthembu osenqobe iComrades Marathon amahlandla amathathu, uzogijma kulo mjaho njengenxusa lawo.

Lo mjaho waminyaka yonke ohlanganisa ibanga lika-42km, elika-21km nelika-10km, uzogijinywa ngoMashi 2. Uzosuka emgwaqweni uMasabalala Yengwa, usongwe enkundleni iKings Park Athletics Stadium, eThekwini.

Ungomunye wemijaho yokwenza izikhathi zokuzibekisela indawo kwiTotalsports Two Oceans neComrades Marathon.

I-DUT isiqale ubudlelwano bokusebenzisana nalo mjaho ohlelwa yiRavens Athletics Club. Uxhaswe yiNdabe Dignified Funerals ngemali noMngeni Water ozoxhasa abagijimi ngamanzi.

Umgijimi ozoshaya kuqala intambo uzohlomula ngo-R15 000 kwabesilisa nabesifazane ebangeni lika-42km. Kwelika-21 km, ozophuma phambili uzohlomula ngo-R4 000, ku10km kuzoba ngu-R2 500.

UMthoko Khuzwayo ongusihlalo weRavens Athletics Club ehlela lo mjaho, uthe kubahlaba umxhwele ukujoyinwa kwalo mjaho yisikhungo semfundo ephakekeme, iDUT.

“Kusho lukhulu kithina ukujoyinwa yiDUT njengozakwethu esizosebenzisana nabo esinethemba lokuthi kuzoqhubeka kukhuthazeke nabanye abagijimi basezikhungweni zemfundo ephakeme. Sifisa ukuwubona lo mjaho ukhula kakhulu kunalokhu oyikhona uze ufinyelele ezingeni leminye ehlonishwayo kuleli,” kusho uKhuzwayo.

UKhuzwayo uveze ukuthi iNdabe Dignified Funerals ibeke eceleni isamba sika-R40 000 esizohlonyulwa ngabagijmi abazohlukaniselana ngokwephula irekhodi lika-2:16 labesilisa elabekwa nguNkosikhona Mhlakwana nelikaNontokozo Mkhize labesifazane lika-2:45.

UMthembu uthe uzosebenzisa lo mjaho ukuzivivinyela eminye asazoyigijima kulo nyaka okuyiTwo Oceans ngo-Ephreli neComrades ngoJuni.

“Kusho lukhulu kimina ukuba yingxenye yalo mjaho. Ngeke ngiwuthathe kancane, ngizogijima impela nje, ngeke ngizithambise njengoba ngizofika nabanye abagijimi bekilabhu yami, i-Arthur Ford Athletics Club. Kuyathokozisa ukubona lo mjaho ukhula ngale ndlela. Ngithemba ukuthi uyogcina ebalwa neminye ehamba phambili,” kusho yena.

Phakathi kwezikhulu zezokugijma ebezizimazise umcimbi wokwethulwa kwalo mjaho, uSteve Mkasi ongumengameli weKZN Athletics, uMqondisi Ngcobo ongusihlalo weComrades Marathon Association (CMA), uSello Mokoena no-Aleck Sikhosana ababengomengameli beKZN Athletics.