IMan City nenselelo yokuvuka ngeLiverpool engagayelwa mphako
LIVERPOOL V MANCHESTER CITY
E-ANFIELD, E-LIVERPOOL
NGESONTO NGO-6-PM
ENGLISH PREMIER LEAGUE
ABALANDELI bebhola le-English Premier League namaphanta jikelele baqala inyanga kaDisemba ngomdlalo ohlabahlosile wokududulana kwezingqungqulu iLiverpool neManchester City obhekwe ngabomvu kusasa ngo-6 ntambama, e-Anfield, eLiverpool.
Lo mdlalo umqoka kuwona womabili la maqembu ngezindlela ezahlukene. ILiverpool okuyiyona edlalela ekhaya, iza kulo mdlalo nje ivutha amalangabi, ayivimbeki njengoba isinqobe imidlalo eyisithupha ilandelana kuyo yonke imiqhudelwano.
Ivulele isibhaxu sika 2-0 kwiReal Madrid ngoLwesithathu kowe-Uefa Champions League, kumanje yiyona eqhwakele phezulu kwi-log yePremier League.
Lokhu kuyinkomba yezimpawu zokubuyelwa yisithunzi kwaleli qembu lase-Anfield ngaphansi komqeqeshi u-Arne Slot, othathe izintambo zokuliqeqesha ngaphambi kokuqala kwale sizini.
Ivule igebe lamaphuzu ayisishiyagalombili phakathi kwayo neMan City esendaweni yesibili njengoba iqengqeleza phambili ngangu-31, iMan City ilandela ngangu-23.
Lokhu kwenza umdlalo wakusasa ube ngobaluleke kakhulu. Iningi lezingqapheli zikholwa ngukuthi ukushaywa kweMan City kulo mdlalo kungabe sekusho ukushabalala kwamathemba ayo okuvikela isicoco.
Lokhu kufakazelwe nangumdlali wasesiswini waleli qembu, u-Ilkay Gundogan.
“Ngumdlalo okungafanele sihlulwe kuwona lo esiyowudlala neLiverpool, ngoba ukwehlulwa kwethu kungabe sekusho ukwakheka kwegebe lamaphuzu angu-11 phakathi kwethu nayo, okungabe sekubeka amathuba ethu okuvikela isicoco seLigi engcupheni enkulu,” kusho uGundogan, ecashunwa yi-Sky News.
Kubhimba uhlelo kwiMan City njengoba isishaywe imidlalo ilandelana kuyo yonke okubalwa nokuxetshulwa kwayo yi-Tottenham Hotspur muva nje, kowePremier League ngeledlule obesengumdlalo wesihlanu ithola isibhaxu.
Lokhu kwenzeke kungakapholi maseko leli qembu laseManchester limemezele ukwelulwa kwenkontileka komqeqeshi uPep Guardiola.
NgoLwesibili i-The Citizens iphinde yaphoxa abalandeli bayo ibambana ngo 3-3 neFeyenoord yaseNetherlands koweChampions ekubeni ike yahamba phambili ngo 3-0, nokuyikho okucasule uGuardiola waziklwebha ngezinzipho ubuso nekhanda lakhe eliyimbungculu, okuphenduke igidigidi ezinkundleni zokuxhumana.
Ukwehlelwa yifomu kwaleli qembu kuhambisana nokulinyalelwa kwalo ngabadlali abamqoka, okubalwa kubona uRodri, uJohn Stones, uJeremy Doku, noMateo Kovacic.
Nokho, ezikaGuardiola zingawusebenzisa lo mdlalo wakusasa ukuguqula izinto, nokubuyisa isithunzi nokuyikho okwenza kulindeleke ukuba kusiphuke izidindi nodaka kuwo.
Imidlalo ye-English Premier League:
Namuhla - Ngo-5pm: Wolverhampton v Bournemouth; Crystal Palace v Newcastle United; Nottingham Forest v Ipswich Town; Brentford v Leicester City
Ngo-7.30pm: West Ham v Arsenal
Kusasa - Ngo-3.30pm: Chelsea v Aston Villa; Tottenham Hotspur; Manchester United v Everton
Ngo-6pm: Liverpool v Manchester City