UMAKHEHLENI Makhaula oyisethenjwa nenjini yasesiswini kwi-Orlando Pirates, ungomunye wabadlali okuzothenjelwa emaveni nasemagalelweni abo esigabeni esilandelayo somkhumulajezi kwi-Caf Champions League Isithombe: BACKPAGEPIX
NAKUBA inkakha ye-Orlando Pirates, uVincent Sokhela, ikuthokozela ukushaya into ecokeme kwaleli qembu kwiCaf Champions League kodwa ikholwa wukuthi usemkhulu umsebenzi ngaphambi kokufeza isifiso seminyaka senkanyezi yesibili ejezini leZimnyama.
IPirates idlule ngehubo esigabeni samaqoqo kwiChampions League ngaphandle kokuhlulwa emidlalweni eyisithupha. Ivale ngenothi eliphezulu ishaya i-Al Ahly yase-Egypt ngo 2-1 eCairo, e-Egypt.
EZimnyama ziqede ziqhwakele phezulu kuGroup C, zangena kuma-quarterfinal ziphelezelwa ngabakhaya bazo, iMamelodi Sundowns, abaqede endaweni yesibili kuGroup B.
Ngaphandle kweZimnyama namaSandawane, amanye amaqembu azibekisele indawo kuma-quarterfinal yi-Al Hilal, MC Alger, AS FAR, Al Ahly, ES Tunis nePyramids.
“Indlela iPirates edlale ngayo esigabeni samaqoqo kwiChampions League ihlaba umxhwele futhi ibuyisa ithemba ngokuhamba kwayo ibanga kulo mqhudelwano kule sizini. Ngikholwa wukuthi ukushayela kwayo ekhaya i-Al Ahly kuzolenyusa kakhulu izinga kubadlali nasemidlalweni elandelayo abasozoyidlala.
“Kodwa-ke ngikholwa wukuthi kuzofanele abadlali basheshe bakuqonde ukuthi luselukhulu ushikishi. Yima zisazoyishuka ngempela imbodla kusukela kuma-quarterfinal kuya emzuliswaneni olandelayo weyandulela owamanqamu,” kusho uSokhela owayekhona ngesikhathi iPirates iwina iChampions League ngo-1995.
“Indlela amaqembu ahlela ngayo izinto iyahluka esigabeni somkhumulajezi osekuyiwa kuwona manje, ngakho-ke ngicabanga ukuthi nabadlali bePirates nethimba labaqeqeshi kuzofanele bakuqonde kahle lokho.
“Kwayona i-Al Ahly le abayishayile, izobuya isishaya ngolunye unyawo, isiwalungisile namaphutha ayo.”
USokhela ukholwa wukuthi sesifikile isikhathi sokuthi iqembu laseNingizimu Afrika libuye nenye inkanyezi.
“Sesiside kakhulu isikhathi manje uma ubheka u-1995 okuwunyaka iPirates eyanqoba ngayo iChampions League, ngaphambi kokuba kube yiSundowns ngo-2016.
“Ngakho, ngikholwa wukuthi sesifikile isikhathi sokuthi iPirates ithole inkanyezi yesibili futhi indlela edlala ngayo kule sizini ikukhombisa ngokusobala ukuthi iyasifuna lesi sicoco. Okudingekayo nje wukuthi balwele ukugcina lo mgqigqo abawukhombise esigabeni samaqoqo, yize ezinye izimbangi zabo zizobe sezivuke emaqandeni.”
Related Topics: