Owe-JDR ubona uzoshuba umbango weligi yeChampionship

USIHLALO nomqeqeshi we-JDR Stars, uNditsheni Nemasisi, ukholwa wukuthi yima sezizoqala okwangempela ukuyishuka imbodla ngombango wesicoco seligi yeMotsepe Foundation Championship, njengoba sekungumzuliswano wesibili wesizini.

Ngempelasonto, amaqembu eMotsepe Championship azoqala imidlalo yesibili yomzuliswano wesibili wesizini ngemidlalo emqoka ngezindlela ezahlukene.

Ngaphambi kwempelasonto edlule yeNedbank Cup, i-JDR ibuyele ngezinkani embangweni wesicoco seligi, ngokushaya iLeruma United ngo 2. Izimbangi zayo iDurban City, zilahle amaphuzu zishawa yiCasric Stars ngo 1-0.

I-JDR enamaphuzu angu-30 emidlalweni engu-16, yehlukaniswe yiphuzu neStars eqhwakele ngangu-31 emidlalweni elinganayo.

“Ukuqala komzuliswano wesibili kusho ukuthi sekuyashuba, wonke umuntu usesebenzela ukuqoqa amaphuzu, ngakho awasafuneki amaphutha angenasidingo. Ukuthola kwethu amaphuzu emidlalweni yethu emibili sibuye ekhefini likaDisemba, yiyonanto ebesiyidinga kakhulu, ukuze sigicine umgqigqo esasiqede ngawo unyaka,” kusho uNemasisi.

I-JDR eyanyukela kwiChampionship ngesizini ngemuva kokuwina amaPlay-Offs kazwelonke eSafa ABC Motsepe League ngesizini ka-2018/19, isizame kaningi ukuwina iligi kodwa izinto ziyiphika.

Ngesizini ka-2021/22 yahluleka ekugcineni ukuzibekisele indawo kumaPlay-Offs, iqeda endaweni yesine kwi-log. Ngeledlule iqede endaweni yesihlanu.

UNemasisi ukholwa wukuthi le sizini kungaba yiyona ezakhe ezingagcina ziphumelele ngayo ukufeza iphupho lazo lokuwelela eKhenana.

“Sesikwenze konke esicabanga ukuthi kuyadingeka ukukhushulelwa kwiPremiership kodwa inhlanhla yiyona elokhu isibalekela. Yingakho kule sizini ngithandazela ukuthi inhlanhla ibheke ngakithi ngoba sinesikwati esiqinile esingakwazi ukunqoba iligi ngaphandle kokuyodlala ama-Play-Offs.

“Mhlawumbe kungaba yiwona nyaka wethu wokukhushulelwa kwiPremiership. Yisizini yethu yesithupha lena kwiChampionship. KwiMotsepe League sadlala amasizini amahlanu, ngeyesithupha sakhuphukela kwiChampionship.”

I-Hammer Boys ibophele abadlali abanamava okudlala kwiPremiership okubalwa kubona uPrince Nxumalo, Chris Matombo, noBoikanyo Komane.

Izotholana phezulu neCasric Stars, kusasa ngo-3.30 ntambama, eSolomon Mahlangu Stadium, KwaMhlanga.

Imidlalo yeMotsepe Foundation Championship:

Kusasa - Ngo-3.30pm:

Casric Stars v JDR Stars (Solomon Mahlangu Stadium); Orbit College v Upington City (Olympia Park)

Ngo-7.30pm:

Cape Town Spurs v Milford FC (Athlone Stadium); Durban City v Kruger United (Chatsworth Stadium)

NgoMgqibelo - Ngo-3.30pm:

Hungry Lions v Highbury (Mxolisi Dicky Jacobs Stadium); Venda FC v Baroka FC (Thohoyandou Stadium); Lerumo United v Black Leopards (TUT Stadium)