‘Ndiyayithanda le ndoda’, utsho uMcKenzie ngoTrump
Usopolitiki uGayton McKenzie wePatriotic Alliance (PA) uye waxhasa izimvo eziphikisanayo malunga noMongameli waseMelika uDonald Trump phakathi kwengxabano phakathi kwala mazwe mabini.
Kwividiyo ekwabelwana ngayo kumakhasi onxibelelwano, uMcKenzie uthe ukungavumelani kwizinto ezithile kuyinto eqhelekileyo kwaye oko akuthethi ukuba akufuneki ungamameli abo banezimvo ezahlukileyo.
“Mamela, mandikuxelele into, phambi kwazo zonke ezi zinto, abahlobo bam bebesazi ukuba ndiyamthanda uDonald Trump. Ndiyayithanda la ndoda. I-PA iyayazi. Ngoku jikijiki, akufuneki ndimthande uDonald Trump? Bendimthanda ukusukela ngeentsuku zenkqubo yakhe kamabonakude,” utshilo.
UMphathiswa wezeMidlalo uqhubekile wathelekisa uthando analo ngoMongameli waseMelika wamashumi amane anesixhenxe kunye nolo analo nesithandwa sakhe xa kukho imilo kodwa bafumane indlela yokubuyelana.
“Ndifuna ukuthi singohluka kodwa lo nto ayithethi ukuba masingamamelani,” utshilo uMcKenzie.
UMcKenzie uthethelele uRamaphosa malunga nokungaboni ngasonye noTrump
Nangona kunjalo, uMcKenzie ukwaxhase uMongameli Cyril Ramaphosa ekubekeni unyawo lwakhe kuTrump malunga nokungavisisani phakathi kwePitoli neWashington ekuqaleni kwale nyanga yoMdumba.
Ethetha kwipodcast kaSizwe Mpofu-Walsh, iSMWX, uthe akukho Mongameli kufuneka angcungcuthekiswe.
“Kum, wayenesibindi sokuthetha oko wayekuthetha. Kodwa ndifuna ukuthi iMelika idinga uMzantsi Afrika ngokukodwa kwaye nawo uMzantsi Afrika udinga iMelika. Lihlakane lethu lesibini elikhulu lorhwebo. Apho ndicinga ukuba iMelika iphosakele khona, kukuba bakholelwa obu buvuvu kwaye basebenzisa iindlela ezingafanelekanga, asiyondlela othetha ngayo nomnye uMongameli leyo.
“UMongameli akufuneki ukuba ufunda kumakhasi onxibelelwano ukuba ucinga ntoni ngokunganeliseki kwabo. Kodwa eyona nto inkulu eyenziwe yiMelika engalunganga kukukholelwa ukuba abantu abamhlophe baphetheke kakubi. Ayonyani leyo,” wongeze watsho uMcKenzie.