UNOBHALA Jikelele we-ANC omisiwe, uMnuz Ace Magashule, ulahlwe yiNkantolo eNkulu yaseSouth Gauteng esicelweni sakhe sokudlulisa icala lokuchithwa ukumiswa kwakhe kwi-ANC. isithombe: Simphiwe Mbokazi/African News Agency/ANA
UNOBHALA Jikelele we-ANC omisiwe, uMnuz Ace Magashule, ulahlwe yiNkantolo eNkulu yaseSouth Gauteng, esicelweni sakhe sokudlulisa icala lokuchithwa ukumiswa kwakhe kwi-ANC.
Lo mholi owayengundunankulu e-Free State ubephonsele inselelo ukumiswa kwakhe kwi-ANC ngo-Meyi. Wamiswa emuva kokuba kuvele amacala enkohlakalo, ukukhwabanisa nokushushumbisa imali mayelana nethenda kaR255 million yokufaka uphahla lwe-asbestos esifundazweni.
UMagashule wamiswa kwi-ANC ngokomthetho owashaywa yiqembu ngo-2017, wokuthi uma umholi ebhekene necala elifaka iqembu ehlazweni kumele ahoxe esikhundleni kuze kube icala liyaphothulwa enkantolo.
Amajaji oJaji Jody Kollapen, Sharise Weiner no Edwin Molahlehi, asichithile isicelo sikaMagashule ngoMsombuluko, wayalelwa nokuthi akhokhe nezindleko zecala.
“Akukho esibona ukuthi enye inkantolo ingafika esinqumeni esihlukile kulesi esisithathile,” kusho amajaji.
Amajaji aqhubeke athi uMagashule ubengenalo igunya lokuba yena amise uMengameli Cyril Ramaphosa.
UMagashule ngesikhathi emiswa ngenxa yalo mthetho we-ANC, wabe esezama ukumisa uRamaphosa ngokuthi uhlelo lokusekwa kwakhe ekubeni wumengameli weqembu lwasekwa ngemali eyizigidigidi. NgoJulayi inkantolo yayivele ikuchithile ukufakela kwakhe inselelo ukumiswa, njengoba ubeselidlulisile icala kumajaji amaningi ngenhloso yokuthi angaphuma nesinye isinqumo.
Related Topics: