South Africa - Johannesburg - 06 July 2023 COSATU members took to the streets of Johannesburg to the economic struggles of the working class. Photo Simphiwe Mbokazi African NewsAgency (ANA).
LUZOGUJWA ngokukhankasela ukuthi i-ANC idle umhlanganiso okhethweni lukazwelonke lwangenyanga ezayo, usuku lwabasebenzi.
Lolu suku olugujwa ezweni lonke kuleli, irali enkulu yomfelandawonye wezinyunyana zabasebenzi iCosatu uzobe useKapa.
Kulo mgubho osenkundleni yemidlalo i-Athlone Stadium, eKapa, kulindeleke ukuthi kukhulume kuyona umengameli walo mfelandawonye uNksz Zingiswa Losi, uMengameli we-ANC nezwe uMnuz Cyril Ramaphosa noNobhala Jikelele weSACP uMnuz Solly Mapaila.
KwaZulu-Natal umugubho walolu suku weCosatu uzoba senkundleni yemidlalo iCurrie’s Fountain eThekwini.
Kuzokhuluma kuwona uNobhala -Jikelele weCosatu uMnuz Solly Phetoe nePhini lokuqala likaNobhala wamaKhomanisi uMnuz Madala Masuku.
ICosatu ayihlonizi ngokuthi yeseka i-ANC ukuthi ibuyele emandleni njengoba kuzovotwa ngoMeyi 29.
UNksz Losi uhlale ekugqugquzela ukuthi kuvotelwe i-ANC nakuba zikhona izinselelo ezweni.
Lo mfelandawonye uzivezile izizathu ezenza ukuthi weseke i-ANC okhethweni.
Uveze ukuthi izinto zijikile kuleli njengoba kuboshwa ngisho umuntu owayenguMengameli weZwe uJacob Zuma nobenguSomlomo wePhalamende uNkk Nosiviwe Mapisa-Nqakula.
ICosatu ibale izinto eziningi ezenziwe yile nhlangano selokhu yathatha izintambo zombuso ngo-1994.
Ezinye zazo imfundo yamahhala, izingane ezihola isibonelelo, isibonelelo sabangasebenzi, amalungelo abasebenzi athinta ukuteleka nokuba ngamalungu ezinyunyana, izinkundla zokuxoxa ngamaholo abasebenzi nezinye.
“Sesiyakwazi manje ukuthi uma umuntu egula ahlabe ikhefu lokugula. Uma eyobeletha akhokhelwe imali yakhe noma elimele.
“Kunezinguquko ezithinta imali yezimpesheni abasebenzi abazokwazi ukuthola ingxenye yayo besaphila, okungezinye zezinto ezenziwe nguMbuso we-ANC,” kusho iCosatu.
Ithe ziningi izinselelo ezisekhona ezweni kodwa igqugquzela abantu bakuleli nabasebenzi ukuthi bavotele i-ANC.
UKhongolose ubhekene nomqansa kulolu khetho njengoba emaningi amaqembu afuna ukuwuketula emandleni.
Okunye ngukuthi kulo nyaka kugujwa iminyaka engu-30 le nhlangano yathatha amandla.
Yilokhu okudala ukwehlukana kwemibono, abanye bathi sebekhathele yi-ANC ayiphume ngoba yehlulekile, abanye bathi ayiqhubeke ihole izwe.
Related Topics: